Г. В. БАЕВ — КОСТА ХЕТАГУРОВУ <17 марта — начало июня>

Мӕ уарзон ӕрдхор<д>, нӕ Иры ӕнхъӕлцау ӕмӕ рӕбинаг цӕджындз, Хетӕджы фырт Къоста! 

Ӕппын дын нӕма у афон рабадын? Цавӕр сӕфты низ дыл бахӕцыдис! Тагъд, нӕ цӕргӕс, дӕ рай- гуырӕн уарзон хӕхтӕм ратӕх ӕцӕгӕлон дард бӕстӕтӕй ӕмӕ дӕ сызгъӕрин хӕтӕлӕй тохы зарӕг ныккӕ нӕ Ирӕн!.. Рагӕй ӕнхъӕлмӕ кӕсӕм мах дӕ диссаг зарджыты чиныгмӕ. Бафӕллад хъиамӕтты астӕу мӕгуыр ирон зӕрдӕ!.. Дӕ зарджытӕ ӕлуто- ны хуызӕн фӕуыдзысты нӕ мӕгуыр адӕмӕн. Цӕмӕй тӕрсыс, нӕ иунӕг ӕгъдынцой!?. 

Ӕгъгъӕд нын у, дӕ чиныджы куы ссарӕм: «Хъуыбады», «Ӕвсати», «Мӕ Иры фӕсивӕд», «Ныббар мын, кӕд-иу дӕм мӕ зарӕг кӕуӕгау фӕзына мыййаг!», «Чи дӕ?», «Кипиани, рухсаг», «Хъазтӕ», «Рувас» — чысыл рӕсугъд чиныг уыдзӕн, ӕмӕ дзы иу дыууӕ мин екземпляры джыппы ауадздзыстӕм ӕмӕ йӕ алырдӕм ӕрвитдзыстӕм, суанг фӕсхох Ирмӕ!.. 

Стыр рухс уыдзӕн уыцы чиныг нӕ дзыллӕйы зӕрдӕйӕн!.. Чи фыссы, уыцы фӕсивӕд тых- джындӕр сӕ зӕрдӕ ратдзысты уыцы стыр хъуыд- дагмӕ. Ӕппындӕр хардзы тыххӕй гуызаввӕ ма кӕ, уымӕн ӕмӕ ахӕм стыр хъуыддаджы тыххӕй ӕхца ссардзыстӕм. Кӕд ын бахъӕуа 100 сомы!.. Фылдӕр дӕр бахъӕуӕд!.. 

Хуыцауӕй дӕ бауырнӕд, фыдбылызӕн ныссагъдтӕ лӕхӕйдзаг «Цӕгат Кавказы» («С<еверный> Кав<каз>). Дӕ муртӕ дын астӕрдтой!.. Уыцы дыууӕ мин сомӕй ӕгас ирон чиныджы хъуыддагӕн стыр фӕндаг скодтаис! Нӕ райгуырӕн чиныгӕй ацы сахат махӕн зынаргъдӕр ницы и... Уырыссагау та махӕн фыссын хъӕуы Петрсахары, Мӕскуыйы, стыр газетты ӕмӕ зурналты, цӕмӕйдӕриддӕр уыдон сты стыр дзӕнгӕрджытӕ; сӕ хъӕр дардмӕ хъуысы, фӕлӕ мах лӕхӕйдзаг газетты фыссынӕй бирӕ пайда не скӕндзыстӕм!.. 

Бузныг дӕ фесты Ир дӕ фысты тыххӕй — «Горские штрафные суммы». Бирӕ газетты фӕзындис дӕ фыст! Курӕм дӕ, куыд фыссай ахӕм рӕтты нӕ мӕгуыр адӕмы сӕрыл хъӕбӕр хорз!.. Уыцы номыр ардӕм рарвит иу 20 екземпляры. 

Рӕхджы ног чиныг фӕзындзӕн — «Гӕлӕбу»! Дӕ зӕрдӕмӕ бацӕудзӕн! Фӕлӕ Иры зӕрдӕ дзуры дӕ зарджытимӕ, уыдон махӕн нӕ хӕзнатӕ сты, ӕмӕ цӕ хъуамӕ радтай!.. 

Тӕригъӕд нын бакӕ де стыр зӕрдӕйӕ! Бафыдӕбон кӕ!.. 

Ӕз дӕр мӕ фӕндагыл ӕнцад размӕ фӕцӕуын!.. Иунӕг дӕн ацы ран, ӕмӕ иттӕг зын сси нӕ дзыллӕйы бирӕ хъуыддӕгтӕм ӕркӕсын!. «Гал ма фӕуас, кӕнӕ уӕдӕ лас!» Мӕ ирон хӕдзары хъуыддӕгтӕ чысылгай аразын. Нӕ хъӕуы рӕхджы хордон ӕмӕ банк араздзынӕн. Банчы ӕгъдау (устав) рӕхджы финанс министырмӕ ацӕудзӕн. 

Фервитын дӕм мӕ мӕгуыр уынаффӕтӕ. 

Цаголов йӕ уырыссаг зарджытӕ ӕрӕмбырд кодта ӕмӕ сӕ иу чиныджы рауадздзӕн... Заглав<ие> «Осетинские мотивы». Иттӕг хорз чиныг уыдзӕн!.. Мӕнмӕ кусы нӕ «Сау-Ӕлдар»!.. Мӕ рахис цонгӕй дӕр мын зынаргъдӕр сси уыцы лӕг! Мӕгуыр нӕ бон! Иунӕгӕй цы дзы скӕндзыстӕм мах! 

Немедленно сообщи, долго ли пробудешь в Питере, хочу выслать тебе статью хорошую из нашей жизни для помещения в журнале или газете. 

Твой Гаппо Баев.